Saturday, February 6, 2016

విశాఖ నగరం

నా విశాఖ నగరం
నవ్యజీవనగమనానికి ఆభరణం
కొండల్లొ దాగున్న కోయిలమ్మ కమ్మనిగానం
విశాలమైనదారుల ఆశలరాగం
శ్రీశ్రీకి పుట్టిల్లు
శ్రీఅరుణానికి గుడిమెట్టు
ఇరవైలక్షల మందికి కలల వేధిక
ఇరువైపులా కాపాడుతున్న సంద్రపు వీచిక
రాబోయేతరాన్ని అక్కునచేర్చుకునే ఆధునికగమ్యం
ఎప్పటికీ నిలిచివుండే అద్భుతానికి చిహ్నం.


శ్రీఅరుణం[పి.శ్రీనివాసరావు]
పంచాయతీ సెక్రేటరి
Dept of panchayatraj
Govt of andhra pradesh,
9885779207

Friday, November 20, 2015

పంచాయతీ రాజ్

పంచాయితిసెక్రెటరీగా నా జాబ్ ప్రొఫైల్ చూసిన నా మిత్రుడొకడు ఏదైనా సేవాసంస్థకి సెక్రేటరీగా పని చేస్తున్నావా అని ప్రశ్నించాడు. ఆది అతని విఙ్ఙానానికి సంబందిoచిన ప్రశ్నే కావొచ్చు...కానీ పంచాయతీరాజ్ ఎంత అత్యున్నతమైన వ్యవస్థో... అంతస్థాయిలో ప్రజలలో ఇంకా మిళితంకాలేదేమో? అని నాకనిపించింది. ఆయితే గత కొంతకాలంగా దీనిలో ప్రగతికారక మార్పులు చోటుచేసుకుంటున్నాయన్నది వాస్తవం. ఈ సందర్బంగా నేను వుద్యోగ బాధ్యతలు నిర్వహిస్తున్న పంచాయతీరాజ్ గురించి నాకు అర్ధమైనంతవరకూ అందరితో పంచుకొవాలని నేను రాస్తున్న వ్యాసం ఇది.
6,40,867గ్రామాలు కలిగి, 69శాతం జనాభాని భరిస్తున్న భారతదేశపు గ్రామీణవ్యవస్థ పరిపాలనలో పంచాయతీరాజ్ విధానం అత్యున్నతమైన అధికారపు కేంద్రం. దీనికింత విలువవుండబట్టే భారతరాష్ట్రపతికి కూడా లేని చెక్ పవర్ గ్రామపంచాయతీకి చెందిన ప్రజాప్రతినిధి అయిన సర్పంచ్ కి ఇవ్వబడింది. అంతగొప్ప వ్యవస్థ గురించి మనమంతా తెలుసుకోవాల్సివుంది. నేను ఈ వ్యవస్థలో వుద్యోగిగా చేరి 500రోజులు పూర్తిచేసుకున్న సందర్భంగా నాకు అవగతమైన విఙ్ఞానాన్ని మీముందుంచుతున్నాను. ఇది నేను నా గ్రూప్ 1 ప్రిపరేషన్లో భాగంగా ఒకప్పుడు తయారుచేసుకున్నదే అయినా ప్రస్తుతం నాకు దొరికిన మరికొంత ప్రత్యక్ష విషయ అవగాహనతో కూర్చి రాస్తున్నాను. తప్పులుంటే నాకు తెలియచేసి దిద్దుకునే అవకాశం ఇవ్వగలరని ప్రార్ధన.
ఈ వ్యాసాన్ని కొన్ని భాగాలుగా విస్తరిద్దాం.
1.పంచాయతీ రాజ్ అంటే ఏమిటి?
2.పంచాయతీరాజ్ ఏర్పడిన నేపద్యమేమిటి?
3.పంచాయతీరాజ్ బలపడటానికి తీసుకున్న నిర్ణయాలేమిటి?
4.పంచాయతీరాజ్ వ్యవస్థ పనితీరు ఏలావుంది?
5.పంచాయతీరాజ్ లో విజయాలు
6.పంచాయతీరాజ్ లొ దోషాలు
7.పంచాయతీరాజ్ లో ప్రస్తుతం జరుగుతున్న ప్రగతికారక చర్యలు
8.పంచాయతీరాజ్ మరింత విజయానికి తీసుకోవాల్సిన చర్యలు- నా సమీక్ష.
ప్రతీ రెండురోజులకూ ఒకసారి ఒక్కొక్క పాయింట్ తో మీ ముందుకొస్తాను.
శ్రీఅరుణం[పి.శ్రీనివాసరావు]
పంచాయతీ సెక్రేటరి
చొంపి & శిరగం గ్రామపంచాయితి...
అరకువేలీ మండలం
విశాఖ జిల్లా
9885779207

Thursday, July 16, 2015

వాలుకుర్చిలో జ్ఞాపకాలూ
[జీవితం అనుభవించడానికి. దాచుకోవటానికి కాదు. చాలామంది ఆర్ధికమైన విషయాలలో పడి హార్ధికమైన ఆస్వాదనని కోల్పోతున్నారు.ఆ లెక్కలచిట్టాలు పట్టుకొని పరిగెత్తే గమ్యం చేరువయ్యాక...తాము ఏదో కోల్పోయామని తెలివి తెచ్చుకొని వేదన పడుతున్నారు. అలాంటి జీవితం ఒకటి...... అనుభవించిన ఆశల నెమరువేత ఈ వాలుకుర్చీలో ఙ్ఞాపకాలు కవిత. సంపాదన వుచ్చులో హద్దుకు మించి పరుగులు పెట్టిన ఆయన చివరి రోజులలో...... తనకోసం ఎంతో ఎదురుచూసి, ఆఖరి చూపు కూడా నోచుకోని భార్య మనసు పడిన క్షోభను గుర్తుచేసుకుంటూ అనుభవించిన క్షణాలు ఇవి.ఆయన చెప్పిన తన ఙ్ఞాపకాలనుండి...వారి కోరికమేరకు నేను రాసిచ్చిన కవిత ఇది.]
నిజం చెప్పు నేస్తం నా నమ్మకం నిలిచేవుందా?
నేను నిలిచిన నీ గుండెలో ఇంకా మొలకెత్తుతూనే వుందా?
నాకు రింగ్ ఇచ్చిన సెల్ కాల్
అవుటాఫ్ కవరేజ్ ఏరియా అంటూ,
నా దూరం చెబుతూ వుంటే..
పీడకలలాంటి ఆ కవరేజీ నీ కడుపుని ఎన్నా ళ్ళని ద్రేవేసిందో?
నీకు గుర్తుందా?నా మొదటి రాక...
నీ హ్రుదయపు వాకిళిలోకి,
కాఫీఇచ్చి, ఉప్మా పెట్టి, మజ్జిగ త్రాగించావు.
ఏంటిరా ఇది కన్నా అంటూ..కంటి పుసిని తుడిచావు.
నువ్వు తినిపించిన ఆ ప్రేమఎక్కడ నెమరువేస్తానోనని.
యెంత జాగ్రత్తగా కాపాడుకున్నానో!!!
కానీ.......
కాలం చూపిన ప్రతాపంలో మొదలుపెట్టిన పరుగులో ఏదో శాపం తగిలింది???
అలాంటి శాపగ్రస్తజీవనంతో...గడచిన కాలం,
నా మీద నీ ప్రేమని తగ్గించలేదని చెప్పు నేస్తం
అక్కడే..
నీ పాదాల చెంతనే వుంది నా ప్రాణం.
కనుచుపుమేరవరకూ సోకర్యాలు,
పర్సునిండా కుక్కిన క్రెడిట్ కార్డులు,
గ్లోబుతో పాటూ తిరిగే పనులు ,
ఇంకా....ఎన్నెన్నో...
ఎంటర్ నొక్కితే చాలు..ఏకంగా స్వర్గాన్నే ముందుంచుతున్నాఇ,
కానీ...
ఆ పచ్చని చేలో,
పూరిగుడిశెలో,
దూరంగా పలకరిస్తున్నసముద్రపు అలల హోరులో,
నువ్వు తెచ్చిన ఇడ్లీ ఆవకాయా తింటూ ..
మనం అనుభవించిన పరవశాలు..
ఒక్క గంట..కాదు కాదు,
ఒక్క నిముషం..అదీ కాదు,
ఒక్క క్షణం..ఇస్తానని చెప్పు నేస్తం,
ఈ క్షణమే వాలిపోతాను నీ దోసిళ్ళలోకి.
ఊ!!!
యాభై వసంతాలు గడిచిపోయాఇ,
అందులో...నిన్నుపొందిన మూడుదశాభ్దాలూ వెళ్ళిపోయాఇ.
ఒక్కసారిగా వాలుకుర్చిలో నడుంవాల్చిన ఙ్ఞాపకాలు..
కోల్పోఇన సాంగత్యాన్ని నెమరువేసుకుంటుంటే..
వయసు మీరిన తర్వాతి ముందు జాగ్రత్త.. మందులే మింగేస్తున్నాఇ.
పిల్లల బంగారు భవిష్యత్తు..విదేశాలకు ఎగిరిపోఇంది.
అందమైన ఇల్లు కాపలాకాయటానికే సరిపోతుంది.
అందుకోలేనంత హోదా కాపాడుకోడానికే పనికొస్తుంది.
ఆఖరిఖి ఈరోజున..
సంవత్సరానికి పది చొప్పున,నీకు కేటాఇంచిన రోజులు..
నిన్ను ఎంత వేదనకు గురిచేసిందో???
ఖరీదుగా కట్టించిన నీ సమాధిమాత్రమే చెబుతుంది!
ఎంత ఖర్చుపెట్టినా...ఇప్పుడు నువ్వున్నది స్మశానంలోనని.
శ్రీఅరుణం[పి.శ్రీనివాసరావు]
పంచాయతీ సెక్రేటరి
చొంపి & శిరగం గ్రామపంచాయితి...
అరకువేలీ మండలం
విశాఖ జిల్లా
9885779207

Thursday, March 19, 2015

ఒక పని సాధించాలంటే దానికై చూడవలసిన భిన్న కోణాలుంటాయి. వాటన్నిటినీ సమ్మిళితం చేయటంలో మనం సంపాధించుకున్న విఙ్ఞానమే వ్యక్తిత్వంగా రూపుదిద్దుకుంటుంది. సహజంగా ఒక వ్యక్తి తన వ్యక్తిత్వాన్ని అభివృధ్ధి చేసుకోవటానికి తన జీవిత విధానాన్ని మార్చుకోగలిగితే చాలనుకుంటారు. కానీ మానవుడు సంఘజీవిగా తనతో పాటూ బ్రతుకీడుస్తున్న సమాజంలో అతని వ్యక్తిత్వవికాసం తనతోనే కాక, ఎదుటి వారినుండి కూడా ప్రభావితమవుతూ వుంటుదని మర్చిపోకూడదు. అందులో భాగమే కనుక  బయట ఇంటర్వూలకు వెళ్ళేటప్పుడో, పదిమందిలో ప్రత్యేకంగా కనిపించటానికో, సమాజంలో అందరికంటే ముందుగా పరిగెత్తటానికో మాత్రమే మన వ్యక్తిత్వ వికాసానికి కావలసిన వివిధ అంశాలను నేర్చుకోవాలని చాలామంది నమ్మకం. అది మన పనికి మంచి ఫలితాన్నిస్తుంది, నిజమే.అయితే ఆ వ్యక్తిత్వం మనకొక కోర్స్ లా కాకుండా, మన జీవితంలా మార్చుకోగలిగితేనే `నువ్వు` అనేది ఒక సంపూర్ణమైన వ్యక్తిత్వం అవుతుంది. అందుకు కొన్ని లక్షణాలు కావాలి. అవి...
1.డ్రస్ కోడ్
2.సంభాషణ
3.ఎదుటివారిని గౌరవించటం
4.సంధర్బోచిత విఙ్ఞానప్రదర్శన
5.ముగింపునివ్వగల సమర్ధత
from my book "anthar bhramanam"

“శ్రీఅరుణం”
9885779207

Friday, October 3, 2014

part -7


ఓడిపోయిన క్షణాలు...
ఇది పోటీ ప్రపంచం. పుట్టిన నాటినుండే అవసరాలకు వరుసలు కట్టాల్సిన బ్రతుకులు మనవి. ఆ ఎమోషన్ లేకపోతే మనకి కూర్చునే రేషన్ కూడా మిగలదు. ఒక్కొక్కదానిలో ఒక్కొక్కరకం పోటీ వుంటుంది. దానిని తట్టుకొని నిలబడిన వారి ముందుకు వెళతారు. మరి మిగిలినవారు సంగతేంటని ప్రశ్నిస్తే??? అది కోటి డాలర్ల ప్రశ్నగా వినతికెక్కుతుంది. ఒక రకంగా ఇప్పుడు మనముందు గెలుపుకోసం జరుగుతున్న ఈ ప్రయత్నాలన్నీ అలా ఓడిపోతున్న వారికోసమే.
ఒక ప్రభుత్వ ఉద్యోగాన్నే తీసుకుంటే... రెండువందల ఉద్యోగాలకి రెండు లక్షలమంది పోటీపడుతున్నారు. అంటే ఒక ఉద్యోగానికి నీతో పోటి పడేవారు సుమారుగా వెయ్యిమంది. ఇందులోనే నువ్వు మెరిట్ సాధించాలి, దానితో పాటూ రిజర్వేషన్ల వంటి సామాజికాంశాలనేకం నీ విజయాన్ని ప్రభావితం చేస్తుంటాయి. వాటన్నిటినీదాటుకుని ఈ రోజులలో ఒక ప్రభుత్వ ఉద్యోగం మెరిట్ ద్వారా సంపాదించాలంటే ఆ కష్టం కేవలం అనుభవించినవాడికే అర్ధం అవుతుంది.అలాంటిదారిలో నేను అనేక ఓడిపోయిన క్షణాలను అనుభవించాను. ఆ క్షణాలలో మనఓటమికంటే అందరూ చేసే వెలివేసినట్లుండే చూపే నరకప్రాయం. దానినుండికూడా మనం మనసాధనని సాగించాలంటే తప్పకుండా మనదైన ఒక ప్రపంచాన్ని నిర్మించుకోవాలి. అలా నాలోని ఆ భావాలని తరువాత వచ్చేవారికి ముందుగానే అందించాలని రచనని మొదలుపెట్టాను. అదే "అంతర్ భ్రమణం" పుస్తకం.
చాలామంది తాము సాధించిన విజయాన్ని ఎలా సాధించామన్నది చెప్పటమే ప్రధాన సూత్రంగా వ్యక్తిత్వ వికాసపు పుస్తకాలను రాశారు. కానీ నేను అలాంటి పుస్తకాన్ని నా ఓటమినుండే మొదలుపెట్టి విజయం అందుకున్నప్పుడు ముగించాను. అందుకే ఆ పుస్తకం రాయటానికి 4సంవత్సరాల కాలం పట్టింది.
ఈ పుస్తకాన్ని రాయటం ప్రారంభించినప్పుడు మనసులో వున్నది పై భావనొక్కటే. కానీ దీనికొరకు తవ్వుతున్న గతం, ఇతరుల జీవితాలూ, భావావేశాలూ, తర్కం.. ఇవన్నీ నాలో నన్నే విమర్శించాయి. ముందు నన్ను నేను మార్చుకోవలసింది చాలావుందని దీన్ని రాస్తున్నప్పుడు నాకు అర్ధమైంది. ఒకరకంగా అది నాకు మొదటి గెలుపు. అలా కొనసాగించిన ఈ రచన పూర్తి అయ్యేనాటికి…. నాకు ఓటమి నుండి తప్పించుకోవాలన్న అభధ్రతాభావం కంటే, విజయాన్ని అందుకోవాలన్న వాంచకంటే,
“విజయంపైనే గెలిచితీరటం జీవితపు సహజగుణం అని తెలిసిపోయింది".
ఒక గొప్ప విజయం మనిషి చేసిన తప్పుల్ని మర్చిపొయేలా చేస్తుంది. ఒక అపజయం అదే మనిషిలో లేని లోపాల్ని కూడా వెతికి తెచ్చి మరీ కృంగదీస్తుంది. ఎందువల్ల జరుగుతుందిలా? మన ఆశయాన్ని నిర్ణయించుకున్నప్పుడే.. దానికి పుల్ స్టాప్ కూడా పెట్టేసుకుంటున్నాం మరి. బ్రతికేది వందేళ్ళే అని తెలిసినా, అందులోనూ సాధారణ జీవితకాలం అరవై నుండి డెబ్బై మధ్యలోనే అని రుజువవుతున్నా, ఇంకా ఇంకా బ్రతుకీడ్చాలని ప్రాణంపై తీపి పెంచేసుకుంటున్న మనం.. మరి.. ఆ కాలమంతా ఎదుగుతూ వుండటం కూడా అంతే అవసరమని ఎందుకు భావించలేకపోతున్నాం?
అదే. ఆ అన్ బ్యాలెన్సింగ్ థాటే..మనల్ని ఓటమి దగ్గర ఓడిపోయేలా చేస్తుందని గ్రహించండి ముందుగా.
అప్పుడు జయానికీ, అపజయానికీ మధ్యనున్న తేడా పెద్దవిషయంలా మనల్ని భయపెట్టదు. ఓటమి అనుభవంగా మారుతుంది. విజయం అలవాటవుతుంది. సాగుతూవుండే జీవితగమనం మనల్ని మరింతగా ఎదిగేందుకు నిరంతరం అధ్బుతాలను చేయిస్తూనే వుంటుంది.
"అదే విజయాన్ని గెలుచుకోవటమంటే"
ఇక్కడ విజయమంటే.. నువ్వు బ్రతికీతేరాలనుకుంటున్న కాలమంతా సంపూర్ణంగా గెలుచుకొనే అలవాటుని సొంతం చేసుకోవటమే.
విజయవాడ విక్టరీ పబ్లికేషన్స్ వారు ప్రచురించిన ఆ పుస్తకం నాకు రచయితగా మంచిపేరు సంపాదించిపెట్టింది. అంతకంటే ఎక్కువగా ఆ పుస్తకం చదివిన కొందరు తమ జీవితపు విలువను తెలుసుకోగలిగామని నాతో చెప్పటం నాకు మరింత శక్తినిచ్చింది.
దానికి చెందిన ఫొటోలనే ఇక్కడ పెడుతున్నాను.
మరోపుస్తకం గురించి ఇక్కడే  తరువాత కలుద్దాం.
మీ
శ్రీఅరుణం
9885779207
విశాఖపట్నం

Friday, August 29, 2014

part-6
నా జీవితంలో నాకేదీ తేలిగ్గానో, అదృష్టంకలిసొచ్చో లభించినవి కాదు. ప్రతీదీకూడా విపరీతమైన శ్రమా, ధారుణమైన సమస్యలను అధిగమించగలిగితేనే దొరొకేవి. ఆ దారిలో అందరిలానే నన్నూ మరికొన్ని సహజమైన అంశాలుకూడా ప్రభావితం చేస్తుండేవి.
ప్రేమపేరిట విఫలమైన బంధం...
చుట్టుముట్టిన ఆర్ధికసమస్యలూ...
పరాజయాలను కత్తులుగా మార్చి నిరంతరం నన్ను ప్రశ్నించి చంపే సమాజం...
ఇవి చాలవన్నట్లు నా నమ్మకాన్ని తమ స్వార్ధానికి వాడుకుని మోసం చేయడానికి సిద్దపడిన కొందరు మహానుభావులూ... ఇలాంటివన్నీ నన్ను నిరంతరం వేధనకు గురిచేశాయి.కానీ వాటిని అనుభవిస్తున్ననేను ఎప్పుడూ సమస్యనుండి బయటకిరావాలన్న వాస్తవాన్నే నమ్ముకునేవాడిని. ప్రతీ సమస్యనీ ఒక శాస్త్రంలా అనుభవించసాగాను. అలా నేను అనుసరించిన ధృక్పధం నన్నొక కవిగా, రచయితగా మార్చింది.
సమస్యలు నాలో రేకెత్తిస్తున్న ఆవేధన, ఆక్రోశం, ఆవేశం....ఇలాంటివాటిపై నేను చేస్తున్న పోరాటంలో కొన్నిక్షణాలలో అలిసిన నా ఆత్మ నాలో ఒక ప్రశ్నను ఉదయింపచేసేది. అది
"నా సమస్యని నేను దాటేసి వెళ్ళిపోవటం నన్ను ఒక మనిషిగా నిలబెట్టవచ్చు. కానీ, ఆ సమస్యని అనుభవించి దానినుండి బయటకు రావటానికి నేను నిర్మించుకున్న సూత్రం అందరికీ అందచేయటం వల్ల నన్ను కాపాడుకున్న ఈ సమాజానికి నేను కొంత రుణంతీర్చుకున్నవాడినవుతానుకదా?" ఈ ప్రశ్నే నాతో కలం పట్టుకునేలా చేసింది. అందుకే నా కలానికున్న ప్రత్యేక లక్షణం "ఫ్యాక్ట్స్ ఆఫ్ ఇన్నర్ సెల్ఫ్"
నా ఫీలింగ్స్ నీ, సమాజం దానిని ఏక్సెప్ట్ చేసిన విధానాన్ని అందరికీ తెలపటమే నా సాహిత్యానికి మూలం అని నమ్మాను. ఆ జాగృతిని అందరికీ అందించాలనే అరుణోదయంలోని చెతన్యం ప్రపంచానికి దీపికలా, నా పేరులోని మొదటి అక్షరం శ్రీ కి జతపరిచి "శ్రీఅరుణం" అనే కలం పేరిట నా అక్షరాలను అందరికీ అందించటం ప్రారంభించాను. అలా మొదలుపెట్టిన నా తొలికవిత 2007లో ఆంధ్రభూమిలో అచ్చయింది. అలా ఇప్పటికి సుమారు వందకవితలవరకూ వివిధ పత్రికలలోనూ, దినపత్రికలలోనూ ప్రచురితమయ్యాయి. అందులో నా తొలికవితను ఇక్కడ వుంచుతున్నాను.

ఈ గుండె గదులలో…

కనురెప్పలు శ్వాసిస్తే కలలు మేల్కొంటాయి
హృదయపు కొలను నుండి ….
ఙ్ఞాపకాల రంగులను ముంచి తెచ్చుకుంటాయి
నేను నువ్వుగా..నువ్వు నేనుగా చిత్రితమవుతున్న ఆశలను..
విరహమనే కాన్వాసుపై..ముద్రించుకుంటాయి .
అనంతవిశ్వాన్నీ జయిoచగల వూహల గమ్యo..
నీ దగ్గరకొచ్చేసరికి ఆగిపోతుంది.
నేనంటే ఇంకేంలేదు..అంతా నువ్వేనంటూ.
నా గుండెలపై తారాట్లాడిన.. నీ చేతివ్రేళ్లు
నా నుదిటిన చుంభించిన నీ బుజ్జి పెదవులు
ఆస్వాదనతో నిండిన మెడపై చెమటను
తుడిచిన అమ్మలాంటి చేతులూ,
ముద్దుగా నెత్తిపై కొట్టి “అమ్మోదేవుడిపేరంటూ”
వెనుకగా హత్తుకొని భుజంపై వాల్చిన తల
.....ఎన్నని చిత్రించనూ..ఈ గుండె గదులలో …..
నిజంగా...
అరుణానికి సంపూర్ణ వర్ణం ఎవరు గీయగలరు???

ఇక నా పోరాటంలో నేను నిలదొక్కుకోవటానికి నా సాహిత్యం నాకు ఎలా సహకరించిందో తరువాత భాగంలో చెప్పుకుందాం.
మీ
శ్రీఅరుణం
9885779207
విశాఖపట్నం

Thursday, July 24, 2014

part 5


  1. ప్రత్యమ్నాయం
    ఇది నిజానికి మన ఓటమిని ఎదుర్కొనే మార్గంలో భాగం కాదు.సమస్యను ఎదుర్కొనే దిశలో మనలో సహజంగా ఏర్పడే వత్తిడి, భవిషత్తుపట్ల భయం వంటి లోపాలను తొలగించుకోవటానికి ప్రత్యమ్నాయం అనేది గొప్ప శక్తినిస్తుంది. మనం ఇంతగా తెగించి చేస్తున్న ఈపనిలో ఏదైనా కీడు జరుగుతుందేమోనన్న సంశయం, ఆశించింది దొరకకపోతే... ఏం చేయాలి? ఏమయిపోతాం? మళ్లీ ఈ కాలమూ,డబ్బూ, అవకాశమూ దొరకకపోతే ఏమైపోతాం? నిజంగా చాలామంది ఈ ఆలోచనవద్దనే ముందడుగు వేయలేక ఆగిపోతున్నారు.ఇటువంటి ఆలోచన వీరిని ఒక అడుగు ముందుకు వేస్తే.. రెండగులు వెనక్కి వేసేలా తయారుచేస్తుంది. అటువంటివారు ప్రత్యామ్నయవ్యవస్థనూ తమ దారిలో భాగంగా చేసుకోవటం ఉత్తమం.
    అప్పటికే నాకు పెళ్ళయ్యి ఇద్దరు పిల్లలున్నారు.దిగువ మధ్యతరగతి కుటుంబం.ఆదాయం నష్టాలతో వుంది.అందువల్ల మరో మార్గం చూసుకుందామని ప్రయత్నం.కానీ దానికో తెగించి డబ్బుకానీ, సమయంకానీ, బిజినెస్ కానీ త్యాగం చేయలేని పరిస్థితి???
    ఇంతా చేసి నేను అనుకున్నది సాధించలేకపోతే???
    నా ఈ ప్రయత్నం వలన ప్రతికూలమైన ప్రభావం తనతో పాటూ తన కుటుంబం కూడా అనుభవించాల్సి వస్తుంది కదా???ప్రస్తుతం చేస్తున్న బిజినెస్ కూడా దెబ్బతినవచ్చుకదా???
    మళ్ళీ నాకు జీవితాన్ని సాధించుకునే అవకాశం వుంటుందా???
    ఈ నాలుగు ఆలోచనలతో భారమైన నాఅడుగులకు నేను చూపించుకున్న సూత్రమే... "ప్రత్యామ్నాయంతో నీవనుకున్న దానిని ముందుకు తీసుకువెళ్ళగలగటం".
    మొదట నా మనసులో వున్నది ఒక పరీక్షలో విజయం సాధించటం ద్వారా సమస్యలనుండి బయటపడటం మాత్రమే. కాకపోతే.. ఆ ప్రయత్నానికి ముందు నేను కోల్పోవాల్సివున్న సమయం, డబ్బు వంటివాటిని పూరించే మార్గం కుడా కోరుకున్నాను. అవి దొరుకుతాయన్న ధైర్యం ఏర్పడితే తన ప్రయత్నం విజయవంతంగా పూర్తిచేసుకోగలననిపించింది. అందువల్ల అప్పటినుండీ నా మార్గాన్ని రెండుగా విభజించాను.
    ఒకటి... విజయం సాధించేదిశగా ప్రణాళిక.
    రెండు... ఏమాత్రం ఓటమి ఎదురైనా..నేను చేస్తున్న ప్రయత్నం ద్వారానే మళ్ళీ ఎదగటం.
    అందుకే నేను ప్రిపేరవుతున్న అంశాలను ఎప్పటికప్పుడూ క్రోడీకరించుకుంటూ..సొంతంగా తయారు చేసుకున్న నోట్స్ ప్రింట్ చేసుకుని దాచుకున్నా. నా ప్రిపరేషన్ లో భాగంగా అద్దం ముందు కూర్చుని తనకితానే క్లాస్ చెప్పుకునేవాడ్ని.అలా చెప్పుకున్న క్లాస్ ని సెల్ ఫొన్ లో రికార్డ్ చేసుకొని మళ్ళీ మళ్ళీ వింటూ తప్పుల్ని సవరించుకునేవాడ్ని.
    ఇలా ఒక విధ్యార్ధిగానేను చేస్తున్న కృషినే, ఒక అధ్యాపకుడిగా మలుచుకున్నాను.
    రెండుమూడుసార్లు ప్రయత్నం కొనసాగింది.అతనికి మంచి మార్కులే వచ్చాయి, కానీ రిజర్వేషన్లూ మరియూ ఇతర రోస్టర్ పాయింట్ల వలన ఉద్యోగం మాత్రం దోబూచులాడుతూనేవుంది. మొదట్లో నా మనస్తత్వంలోనే నేను ఇప్పటికీ వున్నట్లయితే ఆ ఫలితానికి అతను ఎంతగా కృంగిపోయివుండేవాడినో??? కానీ ఇప్పుడు అలా జరగలేదు.
    నిజానికి పరీక్షలవగానే ఫలితాలకోసం ఎదురు చూడలేదు. అప్పటి వరకూ తయారుచేసుకున్న మెటీరియల్ అంతా సిధ్ధం చేసుకుని, పుస్తకాల రూపంలో మార్కెటింగ్ చేయటం ప్రారంభించాను. సొంతంగా ఒక ఎడ్యుకేషన్ హెల్ప్ డెస్క్ పెట్టుకుని, దాని ద్వారా చాలామందికి పరీక్షల విషయమై సహాయం చేయసాగాను.ఇలా పెరిగిన నా సర్కిల్ మరింతగా ముందుకు సాగేందుకు అవకాశం కలిగించింది. ఇంటిదగ్గరలో వున్న ప్రభుత్వ పాఠశాల ప్రధానోపాధ్యాయులుని సంప్రదించి, స్కూలు ఖాళీ సమయంలో తరగతులు నడుపుకునేలా అనుమతులు పొందాను. అలా కొందరికి ఉచితంగా శిక్షణ ఇస్తూ, తన బోధనాపటిమనూ మరియూ పరిచయాలనూ మరింతగా అభివృధ్ధి చేసుకున్నాను.
    ఫలితాలొచ్చేసరికి దాని గురించి బాధపడుతూ కూర్చోకుండా.....ఇలా తన సొంత అనుభవాలే పెట్టుబడిగా చరిత్ర, రాజనీతి శాస్త్రం, ఇంగ్లీష్ అధ్యాపకుడిగా నిలదొక్కుకున్నాను. ప్రత్యమ్నాయపు బలం అదే.
    ఇలా ఇవన్నీ సమస్య పరిష్కారానికి మార్గాలే. అయితే వాటిని ఆయా కాల మాన పరిస్థితులకు అనుగుణంగా మన అవసరాలకు దగ్గరగా ప్రణాళికాబధ్ధమైన రీతిలో నిర్వహించగలిగినప్పుడు..జయం మీకు నల్లేరుమీద నడకే.
    ఒకటి మాత్రం గుర్తుంచుకోండి, సమస్యని పరిష్కరించటమూ విజయం సాధించటమూ ఒకటే కాదు. రెండు దారులతో సాగే ఒకే గమ్యం అవి. సమస్యని పరిష్కరించటంలో ఇప్పటివరకూ మనం చెప్పుకున్నవి సహాయపడుతుంటాయి. విజయం సాధించటానికి మాత్రం మరికొన్ని అంశాలు కావలసివస్తాయి.పరిష్కరించబడిన సమస్య మార్గాన్ని చూపెడుతుంది, కానీ సాధించబడిన తరువాతే విజయం గమ్యాన్ని చేరుతుంది. ఈ తేడాని మాత్రం ఎప్పుడూ మరచిపోకండి. విజయం ఒక నిరంతరయానం మనకు జీవితం వున్నంతవరకూ.అది మనం గుర్తిస్తేనే హృదయమూ మెదడూ నడవడికా అన్నీ చైతన్యవంతంగా ఉండి జీవితంలో ముసలితనం అనే జడత్వాన్ని మన చెంతకు రానీవు. 114 సంవత్సరాలు బ్రతికిన మనిషి ఇంకేం సాధిస్తాడులే అనుకోవద్దు. ఆ 114వయస్సే అతను సాధించిన గిన్నిస్ రికార్డ్ కదా.
    అయితే నా ప్రధానలక్ష్యం మాత్రం ఇంకా పోరాటం సాగిస్తూనేవుంది.కాకపోతే కొందరుమనుష్యులూ, మరికొన్నిమలుపులు నాతో ఆడుకోవటమూ ప్రారంభించాయి. వాటి గురించి తరువాత భాగంలో చెప్పుకుందాం మరో నాలుగురోజులతరువాత.
    మీ
    శ్రీఅరుణం
    9885779207
    విశాఖపట్నం

Tuesday, July 15, 2014

part-4


ఒక వృత్తిపనివాడిగా వుంటూ చదువుకున్న నాకు అందుబాటులోకి వచ్చిన మొదటి అవకాశం ప్రభుత్వౌద్యోగానికై పోటీపరీక్షలకు ప్రిపేర్ కావటం. పి.జి.వరకూ సంపాదించిన అర్హత నాకు ఆ మార్గాన్నిచ్చింది. దాంతో ఆంధ్రప్రదేశ్ పబ్లిక్ సర్వీస్ కమీష వారి ఉధ్యోగ ప్రకటన చూశాను.అవి గ్రూప్ 1,2,4 కేటగిరులకు సంబంధించినవి. నిజానికి అప్పటికి నా మనసులో వున్నది రెండే అంశాలకు చెందిన విఙ్ఞానం మాత్రమే. అవి..
నా డిగ్రీకి సంబంధించిన సబ్జెక్ట్స్ పై వున్న పట్టు,
మరియూ… ఆ ఉధ్యోగాలకు అప్లయ్ చేసి ప్రిపేర్ అవ్వాలన్న తపన. ఇవి రెండే నన్ను ముందుకు నడిపించాయి. వాటి సహాయంతో నేను ముందుగా ఇలా నిర్ధారించుకున్నాను.
"నా ఆదాయం తగ్గబోతుంది. ప్రస్తుతానికైతే నా అదనపు పని ద్వారా సంపాదించుకున్నది అక్కరకొస్తుంది. కానీ కూర్చుని తింటే కొండలైనా కరిగిపోతాయంటారు, అందువల్ల ఇప్పటినుండే నేను మరో అవకాశం కోసం ప్రయత్నించాలి". అందుకోసం నాకు రెండు మార్గాలు తోచాయి. ఒకటి.. నాదగ్గరున్న డబ్బుతో బిజినెస్ ప్రారంభించటం,
రెండు.. కొంత కాలాన్నీ, కొంత డబ్బునీ వెచ్చించి నా దగ్గరున్న లక్షణాలతో మరింత మంచి పొజీషన్ సంపాదించటం. అందుకొరకు ప్రస్తుతం కాలం నా చేతుల్లో వుండనే వుంది. ఇక డబ్బుకుడా వుంది. కాకుంటే ఫలితం మాత్రం ఖచ్చితంగా మంచిగా రావాలి, లేకుంటే కాలంతో పాటు ఇన్నాళ్ళూ సంపాదించిన డబ్బు తిరిగిరాదు. ఇది ఒకరకంగా నాకు తప్ప మావాళ్ళెవరికీ ఇష్టం లేదు. అందువల్ల ఈసారి నేను మరింతగా హార్డ్ వర్క్ చేయాల్సివుంటుంది.
ఒకటి.. నేను గెలవటానికీ.
రెండవది.. నన్ను నమ్మిన వాళ్ళు ఓడిపోకుండా చూడటానికి.
అంటే నా వర్క్ ఇప్పుడు ఎంతో హార్డ్ గా వుండాలికదా.సరే అందుకే ఈ రెండు బాధ్యతలనీ బ్యాలెన్సింగ్ చేసుకుంటూ నేను నా హార్డ్ వర్క్ ని రూపొందించుకున్నాను.
ఇప్పుడు మా పని వున్న స్థితిలో రోజు మొత్తం మీదా ఐదు గంటలకి మాత్రమే సరిపోతుంది. ఇది మాములు ఖర్చులకు సరిపోతుంది. అంటే మిగులు కానీ, అదనపు సంపద కానీ వుండవు.
"అందువల్ల నేను ఉద్యోగానికై బయట ప్రిపరేషన్ తీసుకొనే అవకాశం దాదాపు కత్తిమీద సామే"
అంతకంటే నాకు మిగులుతున్న అదనపు సమయాన్ని మరింత ఎక్కువగా చదవటం ద్వారా, మంచి జాబ్ సాధించి ఈ వెనకబడిన పరిస్థితుల నుండి బయటపడనూ వచ్చూ, అలాగే నా వాళ్ళకు అభధ్రతా భావం లేకుండా తొలగించనూవచ్చు.
అందుకోసం `నాకు పని లేక మదన పడుతున్న సమాయాన్ని హార్డ్ వర్క్ అనే దారిలో మళ్ళీంచగలిగితే చాలు`.
అలా సుమారు మరో ఆరు సంవత్సరాలు కష్టపడాల్సి వచ్చింది. ఎ.పి.పి.యస్,సి, వారి గ్రూప్స్ పరీక్షలలో విజయంకోసం నేను హార్డ్ వర్క్ ప్రారంభించాను. నిజానికి మాములుగా కేవలం అదే పనిమీద మనసుపెట్టి హార్డ్ వర్క్ చేస్తే ఒక సంవత్సరంలొ జాబ్ సంపాదించవచ్చు. కానీ...
నా సొంత పరిస్థితులతో అంటే ఒకవైపు వృత్తిచేసుకోవాలి,
మరోవైపు కుటుంబబాధ్యత చూసుకోవాలి,
అన్నిటికంటే ముఖ్యమైన అడ్డంకి బయటకి వెళ్ళి చదువుకోలేని పరిస్థితి.
వీటిని ఎదుర్కొంటూ నేను ఆ విజయం సాధించాలి కనుక... ఆ సమయం పట్టింది. అయితే ఇక్కడ నాకు హార్డ్ వర్క్ అనేది నాతోపాటుగా అప్పటికే నా చుట్టూ అల్లుకున్న కుటుంబ బంధాలకు ఆలంబనగా నిలిచి, నాకు ఎంతో గొప్ప సాయం అందించగలిగిందన్నది మాత్రం వాస్తవం గా నిలిచిన సత్యం. ఇక్కడే మీకు మరో నిజం చెబుతున్నాను. నిజానికి అంతగా నేను నా లక్ష్యాన్ని నమ్మి నడుస్తున్నా...నాలోనూ కొన్ని అనుమానాలు వెంటాడుతుండేవి. అవి...
ఒకవేళ నేను ఈ ఉద్యోగసాధనలో నెగ్గలేకపోతే...తరువాత భవిష్యత్ లో ఎలా స్థిరపడాలి?
మరోక ప్రత్యమ్నాయం దొరికేంతవరకూ కాలం, డబ్బూ, బాధ్యతలూ ఆగవుకదా...వాటిని ఎలా అనుకూలంగా మలుచుకోవాలి?
ఈ ఆలోచనలే నాకు నా లక్ష్యసాధన నుండే భవిష్యత్ ప్రణాళికను కూడా తయారుచేసుకునే విధానాన్ని నేర్పాయి. అందువల్లనే నేను అధ్యాపకుడిగా కూడా మారగలిగాను. దానికి సంబంధించిన ఒక నిజాన్ని ఇక్కడ చెప్పాల్సివుంది. తరువాత భాగంలో చెప్పుకుందాం మరో రెండురోజులతరువాత.
మీ
శ్రీఅరుణం
9885779207
విశాఖపట్నం-1

Saturday, July 12, 2014

part-3
నాకు తెలిసీ ఈ ప్రపంచంలో ఓడిపోవటానికంటే గెలవటానికే ఎక్కువ మార్గాలున్నాయి. ఎందుకంటే?...ఓటమి ఒక ఫలితానికి గుర్తు. కానీ...ప్రతీ ప్రయత్నానికీ గెలుపన్ననమ్మకమే నాంది. అందుకే నా అవసరాలకుసరిపడినంతగా ఆదాయం రాకున్నా ప్రస్తుతానికి అవసరం కనుక పనిలోనే కొనసాగుతూ చదువనే ఒక్క అవకాశాన్ని నమ్ముకోవటంవలన నా భవిషత్తుకోసం నాకున్న అవకాశాలను వెతుక్కోవటం ప్రారంభించగలిగాను. అలా ఒక వృత్తిదారుడనైన నాకు ఎన్ని అవకాశాలు మార్గాలుగా మొదలయ్యాయంటే... 
1.అధ్యాపకుడిగా
2.ప్రభుత్వ ఉద్యోగానికై పోటీపడే అభ్యర్ధిగా 
3.క్రీడాకారుడిగా
4.రచయితగా 
5.సామాజికసేవా చేయగలిగే ఙ్ఞానం సంపాదించగలిగేలా
6.నాటక దర్శకుడిగా,నటుడిగా
7.కొందరి మాటల్ని నమ్మి అవే వాస్తవాలని ముందుకుసాగి మోసపోయినవాడిగా,
8.ప్రభుత్వ ఉద్యోగాన్ని సాధించి, మళ్ళీ నాకునేనుగా నిలదొక్కుకొని, నాలాగా బాధపడుతున్నవారి ఊరట కల్పించాలన్న సంకల్పంతో ఇలా రాస్తున్న వ్యక్తిగా...ఇలా చెప్పుకుంటూపోతే చాలారకాలుగా నాకు అవకాశాలు కనిపించటం మొదలయ్యాయి. 
ఇక్కడే మీకొక విషయం చెప్పాల్సి వుంది. ఇన్ని అవకాశాలు దొరికాయికదా మరి నా విజయాల సంగతేంటని మీకు అనుమానం రావొచ్చు. అక్కడేవుంది అసలైన ట్విస్ట్. నిజానికి మొదట్లో చెప్పినట్లు నాకు లభించిన ప్రతీదానిలో నేను జీవితాన్ని సెటెల్ చేసుకునేంతగా విజయాలను సొంతం చేసుకోలేని పరిస్థితులే ఎదురయ్యాయి. అలాంటి స్థితులలో నేను ఆత్మహత్య వరకూ వెళ్ళాలని నిర్ణయించుకున్న సందర్భాలూ వున్నాయి. అప్పుడే వాస్తవాలకూ జీవితాలకు వున్న బ్యాలెన్స్ అర్ధంచేసుకోవటం మొదలుపెట్టాను. 
జీవితం బ్రతుకుతెరువుకోసం తాపత్రయపడితే...
వాస్తవం బ్రతుకుమీద తీపిని నిలుపుకోవటానికి పనికొస్తుందని తెలుసుకున్నాను. 
ఇదంతా తెలుసుకుని నిలబడటానికి నాకు లభించిన అవకాశాలను ఒక్కొక్కటిగా చెప్పుకుందాం.
మొదటగా అధ్యాపకుడిగా నాప్రస్థానం చెప్పుకుందాం తరువాత భాగంలో మరో రెండురోజులతరువాత.

శ్రీఅరుణం
9885779207
విశాఖపట్నం-530001

Tuesday, July 8, 2014

మనలో చాలామందిమి.....

PART.2
మనలో చాలామందిమి అవసరాలను తీర్చేసుకోవటానికి ఇచ్చేంత ప్రాధాన్యత, అవకాశాలను అందిపుచ్చుకోవటానికి ఇవ్వం. అయితే ఆ రెండిటికీ మద్యనున్న తేడాను స్పష్టంగా తెలుసుకొని ఆచరణలోకి తేగలిగినవారే జీవితమనే సుధీర్ఘకాలంలో వచ్చే మార్పులకు అనుగుణంగా సరైన ఫలితాలను అందుకోగలుగుతారు. ఈ సూత్రం నాకు పుస్తకపఠనం ద్వారా లభించింది. నేను స్వర్ణకారవృత్తిలో వున్నప్పటికీ చదువంటే నాకున్న ఇష్టం ఎప్పుడూ తగ్గలేదు. చదువంటే కేవలం స్కూల్ కి వెళ్ళి చదివితే అబ్బేదికాదుకదా. అందుకే నాకున్న్నవీలునుబట్టీ పుస్తకాలు సేకరించి చదువుకునేవాడిని. అలా నాకున్న అవకాశాలను తెల్సుకుంటూ మెట్రిక్యులేషన్ ప్రైవేట్ గా రాశాను.ఉదయం 7.30 నుండి రాత్రి 9.30వరకూ నా పనిలో ఖాళీ వుండేదికాదు. మరి చదవటానికి సమయం ఎలా? ఇక్కడే నేను అవసరానికీ, అవకాశానికీ మద్యనున్న ఫలితాన్ని నమ్ముకున్నాను. నా పనివలన వచ్చే ఆదాయంతో కుటుంబ పరిస్థితులనే అవసరాలను తీరిస్తే, నా భాద్యతలు సర్దుకుంటాయి, కానీ...
సీజన్ పరంగానూ,
పోటీపరంగానూ,
మారుతున్న ఆధునికతపరంగానూ మనస్థానాన్ని నిరంతరం నిలుపుకోవాలంటేమాత్రం కొత్తకొత్త అవకాశాలకు అనుగుణంగా మనం మారాల్సివుంటుంది. ఆ మార్పుకు సరిపడేలా నన్నునేను నిలుపుకోవాలంటే మరికొంతసమయం తప్పదని నిర్ణయించుకున్నాను. దానికి సరిపడేలా రాత్రిసమయాన్ని మలుచుకున్నాను. అలా మెట్రిక్, ఇంటర్, డిగ్రీ, పి,జి. మంచి పర్సెంటేజ్ తో పాస్ కాగలిగాను. ఇదంతా నా పని మానకుండానే.
సరే....ఈలోపు పెళ్ళీ పిల్లలూ నాజీవితంలోకి వచ్చేశారు.
మరోవైపు తొంబైల్లో ప్రారంభమైన ఆర్ధికసంస్కరణల పూర్తి ప్రభావం ఈ పదిసంవత్సరాలలో పూర్తిగా అన్ని చేతివృత్తులపైనా విరుచుకుపడింది. నిజానికి నేను నా అవసరాలు తీరుతున్నాయని అక్కడే వుండిపోతే నా చేతిలో కేవలం ఒడిదుడుకుల్లో వున్న చేతివృత్తి మాత్రమే మిగిలిపోయుండేది. ఇప్పటికీ చాలామంది చేతివృత్తిదారులు అదే త్రిసంకుస్వర్గంలో నానావస్థలూ పడుతూనేవున్నారు. ఎందుకంటే వారికి అదితప్ప మరోప్రపంచం తెలీదు పాపం. చిన్నప్పుడే పనిలోకి రావటంవలన చదువుకూ దానివలన ప్రపంచవిధానాలకూ దూరంగావుండాల్సిన పరిస్థితికి వారు లోనవుతారు. దానికితోడు భద్రతలేని వృత్తి అవటంవలన నిరంతరంగా కాపాడుకోవటానికి విపరీతమైన ఒత్తిడిని అనుభవించాల్సినస్థితి!!! అందువల్లనే వారు మరోవైపుకివెళ్ళే ధైర్యం చేయలేకపోతారు. సరిగ్గా ఇలాంటి పరిస్థితిలోనే నేను పూర్తిచేసిన ఉన్నతచదువు నాకు మరో అవకాశంవైపుకి నడిపింది.
ఆ అవకాశం ఎలాంటిదో మరో రెండురోజులుపోయాక ఇక్కడే కలిసి చెప్పుకుందాం.

మీ శ్రీఅరుణం
విశాఖపట్నం
9885779207
A.V.N.COLLEGE DEGREE PHOTO.

Sunday, July 6, 2014

తొంబైవ దశకంలో మొదలైన ఆర్ధిక సంస్కరణలు...

PART 1
మాది స్వర్ణకారవృత్తి చేసుకునే విశ్వబ్రాహ్మణ కుటుంబం. నేను 8వ తరగతిలో వున్నప్పుడు నాన్నగారికి ఆరోగ్యసమస్య రావటంవలన...డాక్టర్ గారి సూచనమేరకు నేను చదువుకు తాత్కాలికంగా స్వస్తిచెప్పి స్వర్ణకారవృత్తిలోకి ప్రవేశించాను. నేను పనిలోకి ప్రవేశించేనాటికి దేశంలో ఆర్ధికసంస్కరణలు మొదలవటం ప్రారంభమయ్యాయి. కొంతకాలంవరకూ సంపాదనగానేవుంది కానీ తరువాతపరిస్థితులలో మార్పొచ్చింది.
తొంబైవ దశకంలో మొదలైన ఆర్ధిక సంస్కరణలు దేశానికి ఏం చేశాయో చెప్పడానికి పెద్ద ఆర్ధిక వేత్తలున్నారు, కానీ... వాటి ప్రభావంవలన మాలాంటి చేతివృత్తులవారి జీవితాలు ఎంతగా బుగ్గిపాలయ్యాయో మాత్రం మాకు మాత్రమే తెలుసు. ప్రభుత్వాలు ఏవో చేశాయంటున్నాయి కానీ, పని చేసేవాడికి కల్పించాల్సిన సరైన ప్రత్యమ్నాయాన్నీ మాత్రం అందించలేక పోయాయనే చెప్పాలి. పనివాడికి కావలసింది పనే. అంతేకానీ కొంత డబ్బు ఇస్తే వాడికి జీవితం ఇచ్చినట్లా? దేశం కొసం సంస్కరణలు చేయటం మంచిదే, కానీ రోజు కూలీపై బ్రతికే వారిని రొడ్డున వదిలేసి దేశాన్ని ఎలా బాగుచేస్తారు? పోనీ వారికోసం ఏదైనా కార్యాచరణ చేశారా అంటే.. అది మధ్యవర్తుల వద్దనే మ్రింగుడైపోయింది. సొంత అనుభవంతో చెబుతున్నా.. సంస్కరణలు దేశంలో పేదవారికోసం, వృత్తిదారులకోసం, స్వయంగా బ్రతుకుతున్న వారికోసం చేసిందేమీలేదు. వారంతట వారు నిలదొక్కుకోవటమో, లేక చావటమో చేస్తున్నారు...ఇప్పటికి కూడా. అలాంటి స్థితులలో నా పని కూడా దెబ్బతింది. లైసెన్సులు రద్దుకావటంతో పెట్టుబడిదారులకి దారులు పూర్తిగాతెరుచుకున్నాయి. రెడీమేట్ సంస్కృతి విచ్చలవిడిగా మారింది అన్నిటిలోనూ. ఆ దారిలో మాలాంటి వారంతా నలిగిపోయారు. ప్రభుత్వానికి లెక్కలు పెరిగితే చాలు, ఇక ఎవడికి వాడే చచ్చీచెడీ తమ జీవితాలను పునర్ నిర్మించుకోవాల్సిన స్థితి!!!
తరువాతభాగం కొరకు మరో రెండురోజుల తరువాత ఇక్కడే కలుద్దాం

శ్రీఅరుణం
9885779207

Tuesday, June 24, 2014

పెళ్ళి ఇద్దరు మనుషుల జీవితాలను కలిపే వ్యవస్థ. పెళ్ళివేడుక కొన్ని కుటుంబాలను కలిపే వేధిక. ఎవరిపనులలోవారు మునిగిపోయే ఈ వేగపు ప్రపంచంలో అనేక ప్రాంతాలనుండి, అనేక పనులనుండి, అనేక వర్గాలనుండి ఆయా కుటుంబాలకు చెందిన వారంతా కాసేపు అన్నీ మర్చిపోయి ఆనందంతో కేరింతలుకొట్టే సందర్భం పెళ్ళివేడుక. మా కుటుంబంలో జరిగిన అలాంటి ఒక పెళ్ళివేడుకని మేమంతా ఇలా కలిసి ఎంజాయ్ చేశాము.

Saturday, June 21, 2014

షర్మిళమ్మ

అభివృద్ధిని నిరంతరం కోరుకునే మన సమాజంలో స్త్రీలు ఎంతగా గౌరవించబడుతున్నారో....మనందరికీ తెలుసు. 1961లో వరకట్ననిషేదచట్టం చేశారు, కాని ఇప్పటికీ వరకట్నం ఎంతగా మనమద్యనుండి నిషేదించామో మనహృదయాలకే తెలుసు. అలాగే నిర్భయచట్టం వంటివాటిని ఎంత కఠినతరం చేసినా ప్రతీరోజు మనచుట్టూ మహిళలపట్ల ఎలాంటి దారుణాలు జరుగుతున్నాయో చదువుతూనేవున్నాం. అలాంటి వాటికోవకు చెందినదే ఇటీవల షర్మిళ చెల్లి విషయంలో జరిగిన సంఘటన. 
విషయమంతా
 నేనిప్పుడు చెప్పాల్సిన అవసరంలేదు, ఒక చెల్లిపై జరిగిన పైశాచికవాదం అది అంతే. ఇలాంటివి సృష్టించేవారికి నేను చెప్పెదొకటే. ఇలాంటి నీతిమాలినపనులు చేసేముందు ఒక్కసారి మీఇంట్లో మీతోపాటు పెరిగిన మీ అక్కనీ చెల్లెలినీ గుర్తుకుతెచ్చుకోండి. ఒక ఆడపిల్లజీవితాన్ని బయటకులాగటమంటే మన జాతి సంస్కృతిని బజారుకీడ్చినట్లే. అది ముందు మీ తల్లితండ్రులు మీకిచ్చిన వారసత్వపు విలువల్నే విచ్చిన్నం చేస్తుంది.ఇలాంటి నీచపుపనులను ఎవరుచేసినా ప్రొత్సహించటం అతిపెద్దపాపం. ఈ తప్పు జరిగిన సమాజంలో ఒకడిగా షర్మిళమ్మకి క్షమాపణలు చెప్తున్నాను.
ఎక్కడ స్త్రీలు గౌరవించబడతారో...అక్కడ పవిత్రత, ధర్మం వర్ధిల్లుతాయి - భగవద్ఘీత.

శ్రీఅరుణం.


9885779207
విశాఖపట్నం-530001

Friday, June 20, 2014

సివిల్స్ ప్రణాళిక.....

నాకు తెలిసీ `ఈ ప్రపంచంలో ఓడిపోవటానికంటే గెలవటానికే ఎక్కువ మార్గాలున్నాయి` కావలసిందల్లా.. వాస్తవం గ్రహించగలిగిన అవసరం మాత్రమే. అప్పుడే ఆ అవసరం మనకు అవకాశాలను పెంచుతుంది.
సివిల్స్ కి ప్రిపేరవుతున్న ఇద్దరు స్నేహితులు, దానికి అవసరమైన టైం టేబుల్, డబ్బు, ఇతర అంశాలలో ఎంతో చక్కగా ప్రణాళిక సిధ్ధం చేసుకున్నారు. ఇందులో రెండవవాడు తన స్నేహితునితో పాటూ చదువుతూనే... అతనికి తెలియకుండా తనకి మరో ప్రణాళిక తయారుచేసుకున్నాడు. వారిద్దరి ప్రణాళిక ప్రకారం వుదయం ఏడు గంటలకి ప్రారంభించే చదువు రాత్రి పది గంటలవరకూ సాగుతుంది. అంటే సుమారుగా పదిహేనుగంటలు. నిజానికి వారి అవసరానికి అది సరైన హార్డ్ వర్కే. ఇది అలా కొనసాగటం ప్రారంభమైంది.
ఇక రెండవ వాని అదనపు పని రాత్రి పదకొండు గంటలకి తన ఇంట్లో మొదలవుతుంది. అలా మొదలైన చదువు అర్ధరాత్రి మూడువరకూ కొనసాగించి పడుకోనేవాడు. అందుకొరకు మొదటివాడికి తెలియకుండా మళ్ళీ ప్రత్యేకంగా బుక్స్, నోట్స్ తయారుచేసుకోవటం మొదలైంది. ఇది కొంత అదనపు పని అతనికి. అయితే
విపరీతమైన శ్రమా,
అవసరానికి మించిన సమయం,
అంతకంటే తను పొరపాటు చేస్తున్నానేమోనన్న చిన్న లోపలి భావం… ఇవన్నీ అతనిలో తన అవసరానికి మించిన డిస్టర్బెన్స్ ని కలిగించటం మొదలెట్టాయి. అది కన్ఫ్యూషన్ కి దారితీసింది. మాములు ప్రణాళికలో కూడా వెనక బడిపోయాడు. చివరికి పరీక్షలనాటికి తీవ్రమైన జ్వరంతో అనుకున్న లక్ష్యం పూర్తి చేయలేకపోయాడు. అతని మిత్రుడు మాత్రం తన ప్రణాళికని ఖచ్చితంగా పాటించి విజయాన్ని అందుకున్నాడు.
ఇప్పుడు నిర్ణయించుకోండి...పోటీప్రపంచంలో మీ స్థాయి ఏమిటో? దాన్ని ఖచ్చితంగా ఫిక్స్ చేసుకొని మీ లక్ష్యంవైపుకి సాగండి.

శ్రీఅరుణం.
9885779207
విశాఖపట్నం-530001

atididevobhava

Art of the Day

closest heart





నీ అడుగులలో నా ఙ్ఞాపకాలు.

వీక్లీ నవల 2009 జనవరి 1 నుండి

ఇక్కడే మొదలవుతుంది


Blog Archive

naa gurenchi meethoo

My photo
visakhapatnam, hindu andhrapradesh, India
srinivasa,saritha,sahitya,srisaran this is my world. in my pen name sri is me,arunam is my heart.